Сярод дабаўленых пазіцый - новыя віды арматуры, круглага пракату, гарачакачаных бясшвовых труб і дроту. Удзельная вага інавацыйнай прадукцыі ў агульным аб'ёме адгрузкі прадпрыемства за кошт гэтага павялічылася да 30 працэнтаў.

"Адзін з новых відаў прадукцыі - сартавы круглы пракат з вугляродзістай сталі маркі C50 mod. Тэхналогія яго вытворчасці была распрацавана па заказе вядомага нямецкага вытворцы аўтакампанентаў. Нараўне з традыцыйна строгімі патрабаваннямі да механічных і хімічных характарыстык да гэтага пракату прад'яўляюцца высокія патрабаванні па якасці паверхні: мінімальная глыбіня паверхневых дэфектаў і абезвугляроджвання. Гэта дае спажыўцу магчымасць аптымізаваць уласны вытворчы цыкл. Тэхнічным службам завода ў цеснай звязцы з вытворцамі ўдалося дабіцца неабходнага выніку. У адрас спажыўца ўжо ажыццёўлена першая пастаўка. Ёсць дамоўленасці па адгрузках на першае паўгоддзе 2021 года", - расказаў прэс-сакратар прадпрыемства Аляксандр Алесік. 

За студзень-сакавік БМЗ экспартаваў металапрадукцыі ў 44 краіны свету на больш як $300 млн. Доля круглага металапракату, прызначанага для аўтамабілебудавання, - каля 10 працэнтаў у аб'ёме экспарту. У бягучым годзе гэта прадукцыя пастаўлялася ў 22 краіны. Лідарамі яе спажывання з'яўляюцца Германія, Польшча, Італія і Нарвегія. 

ААТ "БМЗ - кіруючая кампанія холдынга "БМК" - высокатэхналагічнае прадпрыемства металургічнай галіны. Структурна складаецца з чатырох, звязаных адным тэхналагічным ланцужком, вытворчасцей - мэталургічнай, пракатнай, трубнай, метызнай і цэхаў інфраструктуры. Штогод больш за 80 працэнтаў выпускаемай БМЗ прадукцыі адпраўляецца на экспарт.