Кіраўнік Адміністрацыі Прэзідэнта Ігар Сергяенка 24 чэрвеня з рабочай паездкай наведаў Мазыр, азнаёміўся з работай сацыяльных устаноў і прамысловага комплексу раёна, сустрэўся з працоўнымі калектывамі, перадае карэспандэнт БЕЛТА.

Першым пунктам маршруту стаў Мазырскі драматычны тэатр імя І.Мележа, які сёння адсвяткаваў наваселле пасля маштабнай рэканструкцыі. Будынак быў узведзены ў канцы 20-х - пачатку 30-х гадоў мінулага стагоддзя, мае статус гісторыка-культурнай каштоўнасці. Аднак ён сур'ёзна пашкоджаны пры пажары 2013 года - агонь знішчыў большую частку культурнага помніка.

"Я бачу, як у вашым горадзе беражліва захоўваюцца традыцыі. Веру, што абноўлены тэатр, які змог захаваць сваю трупу, стане сапраўдным культурным цэнтрам не толькі Мазыра, але ўсяго Палескага рэгіёна. І тыя традыцыі, якія былі тут закладзены, захаваюцца і прымножацца", - сказаў на цырымоніі адкрыцця Ігар Сергяенка. Ён пажадаў творчаму калектыву новых поспехаў, цікавых пастановак і папулярнасці ў гледачоў розных узростаў.

Кіраўнік Адміністрацыі Прэзідэнта перадаў сертыфікат на Br100 тыс. для ўмацавання матэрыяльна-тэхнічнай базы ўстановы.

Сертыфікат на Br50 тыс. уручыў тэатру старшыня Гомельскага аблвыканкама Генадзь Салавей. Ён звярнуў увагу, што нават пасля пажару, калі ў акцёраў не было сваіх сцен, яны не спынялі творчую дзейнасць. "За пяць апошніх гадоў сыграна амаль 1,2 тыс. спектакляў, у тым ліку штогод пяць-шэсць прэм'ерных. І гэта не лічачы выездаў у раёны", - сказаў губернатар. За гады пасля пажару амаль 15 тыс. гледачоў з Мазырскага, Калінкавіцкага, Хойніцкага, Нараўлянскага, Ельскага, Светлагорскага, Петрыкаўскага раёнаў пазнаёміліся з творамі беларускіх класікаў і сучасных драматургаў.

У абноўленым тэатры Ігару Сергяенку расказалі не толькі аб рэканструкцыі, але і творчых планах. На новай сцэне артысты прадставілі гасцям кампазіцыю да спектакля "Прымакі".

Пра перспектывы развіцця, мадэрнізацыі ішла размова ў ААТ "Мазырсоль". Генеральны дырэктар Артур Галімаў праінфармаваў Ігара Сергяенку аб спосабах здабычы, вытворчасці, асноўных відах прадукцыі. "У нас 10 свідравін, якія знаходзяцца за 3 км ад вытворчай базы. Прадпрыемства працуе на поўную вытворчую магутнасць", - адзначыў кіраўнік. Ён звярнуў увагу, што асноўнымі спажыўцамі прадукцыі з'яўляюцца харчовая і хімічная прамысловасць.

"Мы экспартна арыентаванае прадпрыемства. 85 працэнтаў прадукцыі ідзе на знешнія рынкі. Значную частку ў структуры замежных паставак займае Расійская Федэрацыя. Аднак апошнім часам яе долю зніжаем, але без страты рэнтабельнасці. Павялічваем адгрузкі ва Украіну, краіны Балтыі", - расказаў гендырэктар. Ён дадаў, што расце спажыванне прадукцыі ААТ "Мазырсоль" і на ўнутраным рынку.

Кіраўнік Адміністрацыі Прэзідэнта пагутарыў з працоўным калектывам прадпрыемства. "Уражанні самыя станоўчыя. Прадпрыемства не зніжала абароты на працягу гэтага года. Амаль тысячны калектыў гатовы выконваць пастаўленыя вытворчыя задачы. Вялікую ўвагу надаюць тут сацыяльнай падтрымцы работнікаў. На такіх калектывах трымаецца эканоміка краіны, яны шукаюць новыя формы работы, рынкі збыту, пашыраюць геаграфію паставак", - сказаў Ігар Сергяенка.

Пра дзяржаўную падтрымку дзяцей, якія засталіся без бацькоўскай увагі, размова ішла ў Мазырскім дзіцячым доме. Сёння ў ім жывуць 55 хлопчыкаў і дзяўчынак з усёй вобласці ва ўзросце ад 4 да 18 гадоў.

Як растлумачыла дырэктар установы Ірына Вішнеўская, гэта першы ў краіне дзіцячы дом так званага кватэрнага тыпу. У кожнай сямейнай групы ёсць свае дзявочыя і хлапчуковыя спальні, гасціныя-гульнявыя, кухня, санітарныя вузлы. Для ўсебаковага гарманічнага развіцця дзяцей створаны ўсе ўмовы. Яны з задавальненнем праводзяць час у творчай студыі, гульнятэцы, з карысцю - на цуд-агародзе, у бібліятэцы або ў этнаграфічным кутку. Маюць магчымасць паправіць і ўмацаваць здароўе ў басейне, спартыўна-трэнажорнай зале, комплексе вулічных трэнажораў. "Мы не проста дзіцячы дом, мы вялікая дружная сям'я", - падкрэсліла дырэктар. Хлопчыкі і дзяўчынкі для гасцей падрыхтавалі творчую праграму.

Для ўмацавання і ўдасканалення матэрыяльна-тэхнічнай базы ўстановы Ігар Сергяенка перадаў дзіцячаму дому сертыфікат. Ён пажадаў кожнаму дзіцяці знайсці сваё месца ў жыцці і захаваць у памяці і сэрцы тую душэўнасць, якая пануе ў дзіцячым доме.

Пасля наведвання сацаб'ектаў і прадпрыемстваў кіраўнік Адміністрацыі Прэзідэнта адзначыў, што задаволены ўбачаным у Мазыры. "Уразіла, з якой любоўю людзі кажуць пра свой горад, пра свой край, пра тое, што робіцца і рукамі саміх калектываў, і мясцовай уладай. Людзі з аптымізмам глядзяць у будучыню, рэалізуюць на практыцы тыя праграмы, якія зацверджаны кіраўніцтвам краіны, бачаць перспектыву", - сказаў на заканчэнне ён.-0-

Новости Беларуси (БЕЛТА)