17.06.2025

У аблвыканкаме абмеркавалі падрыхтоўку і правядзенне фестывалю «Славянскае адзінства» з удзелам прадстаўнікоў прыгранічных абласцей

Маштабныя мерапрыемствы, запланаваныя на Гомельшчыне ў рамках сустрэчы брацкіх народаў Беларусі і Расіі, прымеркавалі да 80-годдзя Перамогі савецкага народа ў Вялікай Айчыннай вайне.

Як адзначыў намеснік старшыні аблвыканкама Дзмітрый Алейнікаў, яшчэ ў 1995 годзе на рэферэндуме беларусы вызначылі правільны шлях інтэграцыі з Расіяй. Час ідзе, узаемаадносіны мацнеюць, а значыць, мацнее славянскае братэрства. 28 чэрвеня 2025 года адбудзецца традыцыйная сустрэча прыгранічных абласцей «Славянскае адзінства». Гэта сімвал непарушнай сувязі нашых народаў, які мае шматгадовую гісторыю. У бягучым годзе сустрэча будзе прысвечана Вялікай Перамозе. У рамках фестывалю з 26 па 29 чэрвеня пройдзе Міжнародны маладзёжны форум «Дружба-2025», будзе арганізаваны Міжнародны дзіцячы лагер «Крыніца славянскага сяброўства – 2025».

Адзначалася, што асноўныя мерапрыемствы адбудуцца ў Гомелі на плошчы Леніна, дзе размесціцца галоўная сцэнічная пляцоўка. Там жа запланаваны майстэрня рамёстваў «Горад майстроў», выстава дасягненняў прамысловасці «Прам-Экспа». Маштабныя інтэрактыўныя лакацыі разгорнуцца на набярэжнай ракі Сож, а таксама ў Цэнтральным парку і ў скверы Дружбы побач з Гомельскім медуніверсітэтам. На стадыёне «Прамень» у Савецкім раёне пройдуць спартыўныя спаборніцтвы ў рамках міжнароднай спартакіяды «Дружба-2025».

– Неабходна зрабіць усё, каб мерапрыемствы прайшлі арганізавана, выразна, цікава, – рэзюмаваў Дзмітрый Алейнікаў.

Арганізацыйны камітэт, у які ўвайшлі прадстаўнікі Гомельскай і Бранскай абласцей, працягнулі абмеркаванне пытанняў, якія тычацца падрыхтоўкі маштабных мерапрыемстваў, наведаўшы месцы іх правядзення, дзе былі расстаўлены акцэнты, вартыя асаблівай увагі.